• info@cancerinformation.com.hk
  • 2121 1328
  • facebook

頁數 [1] 2
杏林專欄 > 馬國權醫生

馬國權醫生
馬國權醫生

管腔A型管腔B型乳癌 - 不吸眼球的甘草Posted by Breast HK in Anti-hormone 荷爾蒙治療, Subtype 乳癌分類乳癌病人經常討論的乳癌類型必然圍繞三陰性乳癌、HER2型乳癌,因為他們吸眼球,但原來大部分病友有嘅乳癌類型,卻是像甘草演員般被人遺忘的「管腔型乳癌」⋯⋯睇一個演員做戲,我地會品評佢內外,一方面我地會睇佢有冇外貌,另一方面,我地又會在意佢有冇演技,演唔演活一個角色,交唔交到內心戲。原來乳癌細胞都好似演員咁有表有裡,一方面醫生會睇佢表面同咩藥夾,另一方面,醫生又會在意佢內心性格,骨子裡係咪一隻惡的乳癌,要嚴加防範。睇一個人外表容易,了解一個人內心很難。睇一隻乳癌表面同咩藥夾容易,了解佢的內心卻很難。以前後生入世未深,揀男朋友當然睇樣行先。以前醫生入世未深,醫乳癌當然睇樣行先。「乳癌都有樣睇?」當然,之前你見我成日提荷爾蒙受體(ER,PR)、標靶受體(HER2),呢D就係乳癌的外表,喺顯微鏡底下做特別漂染(immunohistochemical staining)就已經知道,正常化驗室都做到。荷爾蒙受體陽性,咪荷爾蒙受體陽性乳癌囉。HER2型受體陽性,咪HER2型乳癌囉。荷爾蒙受體陰性,HER2型受體又陰性,咪三陰性乳癌囉。「係囉,咪就係咁簡單囉,又有幾複雜呀?」開頭我都認為作為病人,識到咁簡簡單單咪算囉,所以之前寫咗上面嗰三篇就算,直到有一日,有病人咁問我:「我係荷爾蒙受體陽性,同時HER2型受體又係陽性嘅乳癌,咁我係咩類型乳癌?三陽性乳癌?」事實上我真係見過D台灣網站咁樣叫,不過照譯黎講,英文我地又唔會叫Triple positive cancer,醫學界我地叫呢D做Luminal type(管腔型乳癌)。我諗係時候要寫一篇深入的進階文章去解釋清楚。「無端端又多咗個新名嘅?」呢個新名係源於我地對乳癌的內心世界了解多咗。以前後生入世未深,揀男朋友當然睇樣行先,到年紀大咗,見過情場騙子受過情傷之後,揀老公當然睇性格。以前醫生入世未深,醫乳癌當然睇受體行先,到了解多咗,見過乳癌的各種表現之後,醫乳癌當然睇性格。「點樣可以睇到乳癌性格?」要睇乳癌性格(intrinsic molecular subtype),技術上係複雜好多,要遂個基因排序(DNA Microarray),之後睇每個基因分佈,醫學界觀察到原來乳癌有7種人格,常見臨床重要的有5種,分別係管腔A型(Luminal A),管腔B非HER2型(Luminal B HER2 negative),管腔B HER2型(Luminal B HER2 positive),HER2型非管腔型(HER2 non luminal),同基底細胞型(Basal-like),臨床冇乜用的normal-like 同Claudin low type就唔多講,聽過下就算。「我又想驗下我隻乳癌係乜型人格⋯⋯」對唔住,因為技術複雜,好多野都發展中,暫時冇統一標準,所以冇商用的測試可用。「唓,浪費我睇咗咁耐原來冇得測試⋯⋯」唔好唓住,難道你認為我天生愛打字?當然唔會打咁多字去浪費你寶貴時間。我地冇得測試姐,有得估都得㗎。「估??」原來我地實在受過太多情傷,去得太多speed dating相睇,睇佢眉頭眼額講多兩句,已經摸底成功。醫生只要根據ER、PR、Ki67、HER2、乳癌復發基因測試(例如OncotypeDx/Mammaprint/Endopredict/PAM50)呢五樣野,就可以大致摸到乳癌個底,從而作出治療的建議。跟住下面就會遂隻講講,拿,唔好話唔警告,悶野黎喇:管腔型乳癌(Luminal type)簡單黎講,管腔型乳癌(性格)即係荷爾蒙受體陽性乳癌(外表),原來佢佔據咗整體乳癌的七成,即係大部分人都係呢類,咁常見但咁少人講,以一套戲入面黎講,佢就係唔起眼的甘草演員。喺佢之下細分出三種性格:管腔A型(Luminal A)、管腔B非HER2型(Luminal B HER2 negative)、管腔B HER2型(Luminal B HER2 positive)。乳癌人格一:管腔A型乳癌要稱得上管腔A型乳癌,要滿足以下5個條件:1)ER positive2)PR positive3)Ki67低4)HER2 negative5)乳癌復發基因測試要低危復發組別「 佢有咩咁特別?」圖片來源:電影<我是路人甲>佢係侵蝕性乳癌之中最心地善良的一員,活躍度低(即係喺套戲出現一兩個鏡頭嘅路人甲,連名都冇,對白梗係冇),所以好多時做完手術,荷爾蒙治療已經足夠,好少可化療(除非期數好惡),唔需要標靶治療(因為HER2 negative),電唔電療就睇手術類型同結果。乳癌人格二:管腔B非HER2型(Luminal B HER2 negative)要稱得上管腔B非HER2型乳癌,要滿足以下3個條件:1)ER positive2)HER2 negative3)起碼以下是但一樣中: a)Ki67高 b)PR negative/low c)乳癌復發基因測試要高危復發組別「 佢有咩咁特別?」圖片來源:TVB<張保仔>你會見到雖然佢都仲係荷爾蒙受體陽性乳癌,但已經進一步活躍咗(有一兩句對白,通常都係「吖」一吓就死咗係地下嘅清兵),所以好多時做完手術,荷爾蒙治療固之然要,但在此之前洗唔洗用化療就一個個人,唔需要標靶治療(因為HER2 negative),電唔電療就睇手術類型同結果。乳癌人格三:管腔B HER2型(Luminal B HER2 positive)要稱得上管腔B HER2型乳癌,要滿足以下2個條件:1)ER positive2)HER2 positiveKi67/PR係高係低冇所謂嘅。「 佢有咩咁特別?」圖片來源:蘋果日報你會見到雖然佢都仲係荷爾蒙受體陽性乳癌,但同時亦都係HER2型乳癌,所以已經属於非常活躍(已經進身4線甘草演員,套套戲都有佢份,你一定認得不過噏唔出真名嗰D),所以好多時做完手術,荷爾蒙治療固之然要,但在此之前好多時都要化療加標靶(侵蝕性大過1cm已經要),電唔電療就睇手術類型同結果。既然都講曬D綠葉,雖然有少少離題,唔差在講埋最佳女配角HER2型非管腔型(HER2 non luminal)同最佳女主角基底細胞型(Basal-like),等成個畫面完整D。乳癌人格四:HER2型非管腔型要稱得上HER2型非管腔型,要滿足以下3個條件:1)ER negative2)PR negative3)HER2 positive「 佢有咩咁特別?」圖片來源:<第36屆香港電影金像獎>你會見到佢比起荷爾蒙受體陽性乳癌又再已經惡咗一大節(呢D最佳配角,外貌雖然唔係最出眾,但演技一流,一定留下深刻印象),因為冇荷爾蒙受體,所以少咗D把柄比我地揸住,做完手術後好多時都要化療加標靶(侵蝕性大過1cm已經要),電唔電療就睇手術類型同結果,荷爾蒙治療就唔需要。乳癌人格五:基底細胞型(Basal-like)要稱得上基底細胞型(Basal-like),要滿足以下3個條件:1)ER negative2)PR negative3)HER2 negative「 佢有咩咁特別?」圖片來源:TVB<宮心計>冇錯,你會見到好大程度上(學術研究上雖然唔係百分百相等的),佢即係三陰性乳癌(現實係喺街撞到仲要追住黎鬧琴晚劇中點解你要咁賤格嗰D大奸角),再少D把柄比我地捉住,冇得用荷爾蒙治療,又冇得用標靶治療,手術後好多時只可以靠化療加減電療。「死啦,我係公立醫院做手術,報告冇Ki67,咁點算?我即係咩型人格?」冇咩點算,就正如唔係好多人做乳癌復發基因測試一樣,只可以靠其餘有嘅資料,依住上面的條件盡量去對。乳癌的五型人格當你了解到原來乳癌都分咁多種性格,唔好再奇怪點解自己同隔離病友,明明腫瘤同一size同一期數,但係治療方向卻大相逕庭,佢唔洗化療而我要,原來真係性格決定命運,了解自己喺套戲的角色設定,無論係大奸角定甘草演員都好,安分守己去演活自己呢個角色,先能夠做到真正的樂天知命。有唔明?係下面寫低佢,我會盡量解釋你聽⋯⋯封面圖片來源:毛記電視 馬國權醫生 外科專科香港的乳癌治療資訊 http://www.breasthk.com/facing-breast-cancer/
馬國權醫生
馬國權醫生

Apr.292 唔知由幾時開始,「3D」呢兩隻字對我地好似有特別魔力咁,所有野加個「3D」就即刻覺得好正好正,頓時升格十倍。細路仔去迪士尼睇電影要3D,後生仔打機又要3D,連普通睇電視都要3D。醫生都係人,所以逃唔出萬有引力,今次乳房造影都加個「3D」比佢,係咪頓時覺得正咗好多先?由於亞視已經執咗笠,今次唔係由大姐明帶你睇真D,而係由breasthk同你睇真D⋯⋯2D乳房X光造影未講3D之前,先由淺入深,講咗咩係2D先(拿拿拿,我都話3D對你有特別吸引力㗎啦):傳統嘅乳房造影就係將一個立體的器官(乳房)壓成平面,再照一張X光睇下裡面有冇問題。「壓」呢個過程就係你成日聽到嘅「夾胸」。圖片來源:互聯網一個立體器官裡面如果有問題,我地要定位,自然要有三個軸(X axis,Y axis同z axis)的座標,所以醫生會幫你夾兩個角度,一個側側地睇(MedioLateral Oblique view, MLO),一個鳥瞰式咁睇(Cranial Caudal view, CC)。圖片來源:slideshare.net圖片來源:slideshare.net 「明明地,兩個角度定到位咁仲有咩問題?」將立體變成平面咁睇,諗都諗到有問題,就係唔同層次的影像會疊埋曬一齊(即係你個影遮住我個影),之後有兩個問題會發生:一係有事的地方被前後組織遮住咗(即係有事但偵測唔到),一係就調返轉,明明冇事但D影像疊埋一齊誤以為個度有舊野(即係冇事當有事)。兩個情況都係唔理想的,一個就錯失左及早診治的機會,一個就明明冇嘢但嚇餐飽。「咁好大問題喎⋯⋯」傳統醫生如果有懷疑但唔肯定,通常會叫病人返黎翻照,例如Magnification view/spot compression view等等,希望加大D壓力、放大D、唔同角度等等去睇真D。又或者輔以其他方式(例如超聲波、磁力共振),去睇清睇楚。無論用咩方法都好,當病人一收到醫生/醫院電話要翻照,三魂都一定唔見咗七魄,以為自己呢次死喇死喇實出事喇,原來好多時呢D recall只係技術局限照唔清楚,並唔係自己諗到咁灰咁。為咗突破呢種局限,就輪到我地呢集主角出場,登燈登櫈,3D立體乳房造影,等我帶大家睇真D。3D立體乳房造影「咁3D立體乳房造影又係咩黎呢?洗唔洗帶3D眼鏡睇?」隨著醫療科技大躍進,2011年推出咗第一代的3D立體乳房造影(Tomosynthesis),佢嘅原理係希望用唔同角度(正負7.5度)去望個乳房(立體器官用返立體的方式去評估),咁就可以分辨出唔同層次的組織(原理有如電腦掃描CT scan咁,將乳房每1mm切開一個斷層黎睇,就好似一本書有好多頁,醫生就遂頁遂頁睇,所以係唔洗帶3D眼鏡睇嘅),希望可以解決有病變但被人遮住,或者冇野以為有野的問題。「咁好正喎,點解唔大規模採用嘅?」第一代Tomosynthesis有兩大問題,第一係價錢,因為傳統乳房造影只係睇四張X光片,但3D立體乳房造影動輒要睇成幾十張片(1mm厚一張片),撰寫報告嘅人力物力要求大大增加,成本自然好可觀。第二係輻射量,因爲除左要照多角度之外,傳統2D嗰兩個角度(MLO,CC)都要照,所以輻射量大概係傳統乳房造影的兩倍(因爲佢要照一套3D,之後再照一套2D,廠叫呢個做Combo Mode)。一聽到貴,二聽到輻射,三再加上缺乏大量數據支持(因為新),所以阻礙咗佢大規模嘅發展(其實都叫發展得好迅速㗎喇)。第二代3D立體乳房造影「咁好可惜⋯⋯」又唔洗咁快可惜住,有得第一代自然有第二代(2013年推出),而家輻射嘅問題已經9成獲得解決,3D立體乳房造影的輻射量已經同傳統乳房造影相約。佢已經唔洗再分照一套3D一套2D,個系統已經進步到只照一套3D,就已經可以後製合成做2D片(用一個叫C-View嘅軟件後製,廠叫呢個做TomoHD Mode)。照多咁多角度,但輻射量竟然差不多,呢個係一個好驚人的進步。「咁好,咁公立醫院有冇得照呢?」一間間,有D教學醫院/龍頭醫院有,有D資源冇咁豐富嘅醫院當然暫時未有。「咁如果我自己出去照又幾貴?」如果係私家做3D立體乳房造影加超聲波,大概$3800,相比起傳統乳房造影加超聲波的$2200,仲係貴咗一節。「貴咁多,仲有冇其他賣點先?」3D立體乳房造影仲有標榜冇咁痛,因爲唔洗好似傳統咁夾到扁晒,對於一D怕痛的女士係好吸引嘅。而且佢用電腦合成(C-View)的後製2D片,係仲清過直接照的2D片(真係竟然咁都得),其實都唔難理解,就好似手機HDR(high dynamic range)相咁,影幾張相合成後的色域係好過直接影一張相一樣:圖片來源:lowdose3d.com上圖FFDM 2D即係傳統2D乳房造影直接照出黎嘅片,C-View 2D即係3D後製合成2D片,你係右上角放大嗰度會見到C-View 2D睇鈣化點仲清淅過傳統直出片,真係要寫個服字。圖片來源:lowdose3d.com至於呢幅圖呢就顯示指住嗰舊癌,又係C-View完勝。另外D研究仲話可以減低回頭翻照率(recall rate)達40%,同增加發現侵蝕性癌症率(invasive cancer detection rate)達41%,呢個又係好重要嘅賣點。大勢所趨當日數碼乳房造影(digital mammography)取締菲林乳房造影,情況就有如數碼相機取締菲林相機一樣。今日的3D立體乳房造影,就有如連手機都做到高速連拍一樣,要捕捉小朋友笑容一刻,點都好過冇連拍的手機,取締2D乳房造影,實在是大勢所趨,價錢就係最後唯一的障礙。有唔明?係下面寫低佢,我會盡量解釋你聽⋯⋯封面圖片來源:亞洲電視<今日睇真D>截圖 馬國權醫生 外科專科香港的乳癌治療資訊 http://www.breasthk.com/facing-breast-cancer/
馬國權醫生
馬國權醫生

呢度有成功戰勝乳癌的妳所要知嘅野:醫好乳癌之後點跟進?乳癌點check?乳癌復發10大病徵?乳癌復發點算好?乳癌復發治療攻略⋯⋯之前成個Blog嘅主題都係圍繞住關注乳房健康的妳、同埋面對乳癌挑戰的妳,寫咗68篇,對嗰D急需人幫手嘅困惑病友/家人,希望已作出適當照顧。同一時間,收到網友要求,話可唔可以寫吓「⋯⋯完成治療後,要定時做咩檢查?做幾密等等⋯⋯」「⋯⋯往後要注意D咩?復發有咩症狀?乳癌點check?」「⋯⋯不過 hope for the best prepare for the worst, 想問復發或轉移咁又點呢?」,我諗呢個時候,都係時間開一個新嘅篇章「成功戰勝乳癌的妳」。呢篇將會成為另一個文章總滙(就好似關注乳房健康的妳、同埋面對乳癌挑戰的妳咁),要bookmark就bookmark埋呢度。至於寫咩好呢?雖然我心裡有個大致印象,但我都想聽聽妳嘅建議,好讓我地一齊去描繪呢個「成功」篇章,鼓勵吓同路人。「乳癌分類」教你點分自己乳癌係邊類,了解多D自己個病,做好治療同保養:三陰性乳癌 - 係咪真係咁惡?乳癌類型巡禮 - 與你細數HER2型乳癌的歴史荷爾蒙受體陽性乳癌-是福還是禍?「乳癌心靈復康」同你一齊面對精神上嘅困擾,幫你重新企返起身:乳癌化療甩頭髮 - 點處理?幾時生返?義乳的秘密 - 重建乳房手術外的另一片天乳癌康復後懷孕 - 我想生BB!乳癌淋巴水腫 - 真係冇得搞?「乳癌同路人分享」系列,等過來人帶領你越過乳癌幽谷(歡迎投稿,與同路人分享你的喜怒哀樂):一同走過乳癌的幽谷-夢想高飛夢想高飛-夢夢想高飛-想夢想高飛-高夢想高飛-飛「乳癌檢查」教你醫好乳癌之後點跟進?乳癌點check?:乳癌檢查 - 醫好乳癌之後點跟進?乳房磁力共振(MRI Breast)-我又洗唔洗照吓?「乳癌復發解碼」解開乳癌復發的困擾:乳癌復發10大病徵 - 你記緊要留意乳癌復發點算好?乳癌復發治療攻略 - 求生大作戰封面圖片來源:改篇自wikihow分段圖片來源:改篇自互聯網 馬國權醫生 外科專科香港的乳癌治療資訊 http://www.breasthk.com/facing-breast-cancer/
馬國權醫生
馬國權醫生

「乳癌食療及食物禁忌」話比你聽咩食得、咩唔食得、點樣補身?原來西醫都有戒口⋯⋯乳癌食療及食物禁忌 - 戒食雞?戒豆漿?乳癌化療期間之飲食 - 點補身?洗唔洗戒口?「乳癌中醫治療」話比你聽中醫得唔得,幾時先可以試中醫:乳癌中醫治療 - 我唔想做手術,中醫得唔得㗎?「保險魔鬼細節你要知」教你喺未對抗乳癌病魔前,如何對抗保險公司陷阱:乳癌治療費用 - 危疾保險保唔保?乳癌手術費用 - 手術收費貴唔貴?醫療保險包唔包?「乳癌同路人分享」系列,等過來人帶領你越過乳癌幽谷(歡迎投稿,與同路人分享你的喜怒哀樂):一同走過乳癌的幽谷-夢想高飛夢想高飛-夢夢想高飛-想夢想高飛-高夢想高飛-飛「乳癌支援」系列等你知道有咩人係你最沮喪嘅時候幫到你手:患癌母親的兒童支援乳癌資助計劃 - 為你搜盡全城最紅乳癌優惠有乳癌怎麼辦? 心裡有疑問?上面冇你要嘅野?去「關注乳房健康的妳」睇吓有冇⋯⋯http://www.cancerinformation.com.hk封面圖片來源:改篇自wikihow分段圖片來源:改篇自互聯網 馬國權醫生 外科專科香港的乳癌治療資訊 http://www.breasthk.com/facing-breast-cancer/ 延申閱讀 :面對乳癌挑戰的妳 ( 上 ) http://www.cancerinformation.com.hk面對乳癌挑戰的妳 ( 中​ ) http://www.cancerinformation.com.hk
馬國權醫生
馬國權醫生

「乳癌化療」系列教你乳癌化療嘅一切:我需唔需要化療?用咩化療好?有咩副作用?點處理?希望你見到呢個世界,原來黑暗盡頭係一片光明⋯⋯乳癌化療需知 - 我洗唔洗化療?乳癌化療時間 - 手術前做?手術後做?乳癌化療需唔需要 - 著數計算機火併乳癌基因測試乳癌化療AC針TC針 - 乜藥黎㗎?乳癌化療選擇 - 咁多組合點樣揀?乳癌標靶治療 - 乳癌HER2型點樣揀?乳癌雙標靶治療-HER2型乳癌的春天乳癌化療費用 - 要用幾多錢?貴唔貴?乳癌化療療程 - 吊針過程大公開乳癌化療甩頭髮 - 點處理?幾時生返?乳癌化療嘔吐 - 終極止嘔藥乳癌化療副作用 - 辛唔辛苦?點處理?乳癌化療期間之飲食 - 點補身?洗唔洗戒口?「乳癌標靶治療」系列教你標靶治療嘅一切:點配合化療?費用貴唔貴?有咩副作用?乳癌化療AC針TC針 - 乜藥黎㗎?乳癌標靶治療 - 乳癌HER2型點樣揀?乳癌雙標靶治療-HER2型乳癌的春天乳癌類型巡禮 - 與你細數HER2型乳癌的歴史「乳癌電療」話你聽電療同化療有咩分別?過程係點?有咩副作用?有咩後遺症?費用幾多?清楚了解之後你就知道原來鬼片冇鬼,原來唔洗驚⋯⋯乳癌電療大解構-原來唔洗驚「乳癌荷爾蒙治療」話你聽點解要食抗女性荷爾蒙藥?有咩藥揀?點食法先最啱你?食幾耐?幾多錢?有咩副作用?希望你日日keep住食,藥箱都變成首飾箱⋯⋯乳癌荷爾蒙治療 - 點解我仲要食藥?乳癌荷爾蒙藥-究竟食咩藥?乳癌荷爾蒙藥-不同年紀嚴選最正確食法荷爾蒙受體陽性乳癌-是福還是禍? 封面圖片來源:改篇自wikihow分段圖片來源:改篇自互聯網 馬國權醫生 外科專科香港的乳癌治療資訊 http://www.breasthk.com/facing-breast-cancer/ 延申閱讀 :面對乳癌挑戰的妳 ( 上 ) http://www.cancerinformation.com.hk面對乳癌挑戰的妳 ( 下​​ ) http://www.cancerinformation.com.hk
聯絡電話:
2121 1328
聯絡地址:
Flat B, 8/F., Mow Hing Industrial Building, No.205 Wai Yip Street,
Kwun Tong, Kowloon, Hong Kong
香港觀塘偉業街205號,
茂興工業大廈8樓B室

聯絡地址:
Flat B, 8/F., Mow Hing Industrial Building,
No.205 Wai Yip Street, Kwun Tong,
Kowloon, Hong Kong
香港觀塘偉業街205號,
茂興工業大廈8樓B室
聯絡電話:
2121 1328

聯絡電郵:
info@cancerinformation.com.hk

會員註冊 | 私隱政策 | 服務條款
版權所有 不得轉載 © Copyright 2013 Cancer - information Co. All rights reserved. Powered by BIC Online